TUNGZANG KHUA TANGTHU TOM KIM

 

Tungzang Khua Omna Mun:  Zogam, Tedim khuapi pan nitumna leilu lam Tei (18 miles) gamlatna ah om a, tuipi maitang pan a sanna pi (Fts. 5080’) munah om hi.  Nisuahna lam pi (6651’) asang Nanglemvum mualpi omin, nitumna lamah pi (fts.7160’) asang Teute mualsangpi omin Zogam sung Mualsang minthangte lakah khatin kihel hi. Tungzang gam sungah Mual (mountain) vekpi 24 omin, Lui (Stream) vekpi gawm 41 om a, Ciktui (Fountain) vekpi gawm 10 om hi. Nisuahna lamah Anlangh khua omin, nitumna lamah Ngalbual khua le Suangsang khuate om hi. Leilum lamah Tuipi khua le Pangzang khuate om a, leitaw lamah Tuithang khua om hi.

Tungzang Khua Kisatna:   Zomite Ciimnuai munah kiteeng masa cih tangthu sulkan atam zaw in ciamteh uh hi. Pu le pate ahi adiakdiak in Thangho le Liandote Unau pen Ciimnuai pan Geeltui, Dimpi, Dimlo cihte ah na lal toto uh a, tua mun pan kipan Dimmite’ piankhiatna khang kisut ahi hi. Mangkang gamkek (British Emperor) te hong khantoh ciangin, Dimlo pan Laaitui khua kitung in, Pu Pausuang (Gualnam) in Laaitui hausa semin 1895 kum dong kiteng hi. 1895 kumin Laaitui khua pan Naulak le Hatzaw beh Dimmite Tuithang khua ah kilal in 1898 dong kiteng hi. Tuithang hausa Pu Singkam le Pau Za Lian (Sukte) akilemlohna hangin 1899 kumin Pau Za Lian makai in,a nuai a mi 23 te’n Tungzang khua sat uh hi.

Khuasat / Tui Khuat Pupite:

Pu Pau Za Lian (Makaipi)   – Sukte beh

Pu En Go                              – Hatzaw

Pu Lut Kham                        – Hatzaw

Pu Lam Khup                       – Hatzaw

Pu Gen Ngul                         – Hatzaw

Pu Thang Hau                      – Naulak (Dothang)

Pu Tuang Zel                        – Naulak (Dothang)

Pu El Kham                           – Naulak (Dothang)

Pu Mang Dam                      – Naulak (Dothang)

Pu Lam Neng                        – Naulak (Dothang)

Pu Son Gin                            – Naulak (Dothang)

Pu Pau Ngul                          – Naulak (Dothang)

Pu Kham Thawng                 – Naulak (Tuang Eng)

Pu Khen Phung                     – Naulak (Tuang Eng)

Pu En Khup                            – Naulak (Tuang Eng)

Pu Kham Ngul                       – Naulak (Tuang Eng)

Pu Sing Thang                        – Naulak (Lunzong)

Pu Go Thawn                         – Naulak (Tualkong)

Pu Awn Son                           – Naulak (Hausasung)

Pu Soi Ngul                            – Naulak (Hausasung)

Pu Tawng Gin                        – Naulak (Hausasung)

Pu Phung Awn                      – Naulak (Hausasung)

Pu Tun Lut                             – Guite

Tungzang Khua min Piankhiatna:    1899 kumin Tuithang khua pan Tungzang khua kisatte in Suangtuilui dungah giahphual satin teng masa uh hi. Tua mun pan a tunglam mun khatah Tuikhuk (Ciktui) khat mu uh ahih manin, “Hih i tungzang a om Ciktui belin teng to ni” ci-in, tua laimun ah tengto pah uh a, Tungzang khua kici hi. Tua Ciktui mun pen tuni dong om lai-in “Tungzang Sih” kici hi.

Tungzang khua sat cil 1899 kumin Tungzang sih tui kine /kidawn in, tua zawh a sawt lo akipan Tuikhuatte’ khuatna munte ahi; Thanlui, Bellei lui, Luipi lui, Kelkong lui le Tuinak lui cihte kine toto hi.

 

 

Tungzang Khua ah Hausa sem Ngei teng:

Pu Thang Hau              – Naulak (Dothang), 1899 – 1902

Pu En Go                      – Hatzaw                 ,   1902 – 1921

Pu Lam Pau                 – Hatzaw                  , 1921 – 1941

Pu Go Za Thang          – Hatzaw                  , 1941 – 1960

Pu Vung Go Kap         – Naulak (Dothang), 1960 – 1965

Pu Pau Khaw Hau      – Hatzaw                 ,  1965 – 1972

Pu Awn Khen Thang  – Naulak (Tualkong), 1972 – 1974

Pu Thawng Kho Pau  – Naulak (Dothang),  1974 – 1978

Pu Cin Lian Thang      – Naulak (Dothang),  1978 – 1980

Pu Zam Kho Thawng – Naulak (Dothang),  1980 – 1985

Pu Thawn Khaw Kam- Naulak (Tuangeng)  1985 – 1988

Pu Cin Lian Thang      – Naulak (Dothang),  1988 – 1992

Pu Zam Tung Thang   – Naulak (Dothang),  1992 – 1997

Pu Thawng Cin Lian   – Naulak (Tuangeng) 1997 – 2000

Pu Gin Za Kap             – Naulak (Lunzong), 2000 – 2006

Pu Cin Kap Go Pau     – Hatzaw                     2006 – 2013

Pu Thang Za Lian        – Naulak (Lunzong), 2013 – 2015

Pu Kap za Khai            – Naulak (Tuangeng) 2015 – 2018

Pu Kham Lian Hau     – Hatzaw                      2018 –

 

Tungzang Khuasat akipan Thupiang Tuamtuamte:

– 1899 Tuithang pan Pupi 23 te’n Tungzang khua kisat / kiphutkhia uh hi.

– 1904 Pu Tun Dam makaihna tawh Laipian (or) Beltungmut kici biakna kiphuankhia hi.

– 1913 March 12, ni-in Tungzang khua Inn 40 sung pan Inn 14 mei-in kangtum hi.

– 1917 Tungzang khua pan mi 17 Piantit pai-in khuazang kidah mahmah a, Pu Dong Vum simloh 1918 kumin cidam in tung kik uh hi.

– 1920 kum akipan Pi Zel Kim pen Vankah/aisan thei-in, a sisate kiangah thudong thei / thungen thei bek tham loin, a khut sungah van le naa tuamtuam om pah lianlian hi.

– 1925 Pu Pum Khai le Pu Awn Tual vaihawmna tawh Dolmual a Taksing Tuidawl ding sui in, Tuinak bul pan tui kila hi.

– 1928 Tungzang pan Suanghoih (Tongphai) khua kisat in, Inn 13 paikhia hi.

– 1937 Rev. Vial Nang (Tonzang) in Pu Lam Pau inn ah Pasian thu genna nei hi.

– 1941 Gilsan /Zavat (Dysentery) natna tawh mi 70 si hi. A hang pen Pu Hauvial huansak Lampi laizang ah lamkhat le tongkhat asau Gulvompi khatin lampi khaktan in om a, Siampu Pu Go Khai in gawlmam khat tawh satlum hi. Tua khit a sawt loin, Pu Vungh Kham inn nuai ah Vompi khat lutin, inn ngak nupite’n delh mang uh hi. Tua hun laitak in Aisan / thungen thei Pi Zel Kim in a thungetna-ah, “Na khua siam Gulpi thatlum in, Dawi mittaw khualzinte na hawlkhiat manun, Dawite in hong valhtum uh hi” ci-in thusuak genkhia hi.

– 1942 April-July khali sung Gilsan /zavat (Dysentery) natna om leuleu in mi 74 si hi. Dawi gal tung kici in khua nusia in gamlak ah kiteeng a, Uileipiteh zatui in kizangh hi. A hang pen Tungzang ah Kial tung ahih manin, Kawlpi ah antaw ding apai Pu Vum Thawng, Pu Thang Khaw Khen le Pu Zel Za Thangte’n Tedim khua kiang Lailo khua-ah Gilsan natna om ahih lam theilo in nawk kha uh hi. Kawlpi pan a ciahkik ciangin Phatzaang ah amauteng gilsan natna ngah pah uh hi. Pu Vumthawng Tedim zatopi ah kipuak pah a, dam zolo in khua lam kipuakik in Meitei Gun dung pan si hi. A luang ni 3 sung kikoih ahih manin, mi tampi kilawh ziahziah in mi 74 dong kisi hi.  Tedim pan Siavuan Hau Za Cin Pau pen Tungzang ah pai in zatui sun ziahziah ahih manin kilawh nawnlo in bei siang hi. Dawi gal hi loin Gilsan (Dysentry) hang ahi hi.

– 1944 Leitung galpi nihna-ah Japan te’n Tonzang bomb khiat ding kim lai thukizakhial in, Tungzang Bomb khiat kha a, mi 11 si, 5 liam, Inn 2 kangtum, Inn 2 kisia hi.

– 1945 Tungzang pan India gam Hiangmun khua kisat in, Inn 30 kilalkhia hi.

– 1945 Inn 100 kipha a, Pu Vung Thiau makaihna tawh Tuikhiang pan Siktuizawl neute (Smal Iron Pipe) kipua in, Singtuldawl (Wood) kilaih hi.

– 1947 Pu Ngul Za Thawng makaihna tawh Baptist Church kiphuankhia

– 1948 Tungzang Private School kiphuankhia

– 1957 Pu Vung Pum makaihna tawh RCM pawlpi kiphuankhia

– 1957 Tuinak lui pan Siktuizawl (Iron pipe) tawh Tui kila

– 1961 Kumpi pan Tan 4 sang kingah in, Siapi Vung Heh Kam (Kapteel) in Siapi sem

– 1962 Kanteng (Tamah Way zamah) kiphuankhia

– 1967 A khatveina Bawlung tualpi kito

– 1967 Siapi Gin Za Piang in Mandalay University pan B.Sc degree ngahin Tungzang khuasuak sung pan Degree ngah masapen hipah

– 1969 Naupang kum 10 kim vive 25 si

– 1972 Tungzang Kyizua Ohsuh (Khawk) kingah

– 1972 Rev. Hau Lian Kham, Rev. Go Za Kham, Rev.Gin Khan Kham le Rev. Kapluia ten Lungdamna thu genna nei

– 1973 Pu Thawng Tual in Leicial to in Buhsih nek kipankhia

– 1974 University sangnaupang masapente ahi; Sia Gin Za Piang, Sia Khai Za Cin, Sia Khen Za Kam, Sia Cin Lian Sum le Sia Thang Do Dalte’makaihna (Shield) kitah in, khua 12 pan bawlung kidemsak

– 1976 India, Lamka pan Rev. Pum Za Thang Tombing in Lungdamna thugenna nei

– 1978 Assemblies of God pawlpi kiphut

– 1980 United Pentecostal Church (UPC) pawlpi kiphut

– 1982 Nausuak zato kingah

– 1985 Evangelical Baptist Church pawlpi kiphut

– 1986 NAC pawlpi kiphut in, a makaipa Pa Gin Lian Thang zong Ordanation kipiapah

– 1986 Tungzang khua ah mawtaw (Jeep)te tung

– 1988 UNICEF huhna tawh Teute tuilakna ding Nylon pipe kingaha, 1992 kumin honna kinei.

– 1993 Major Dal Khan Mang in galkap sepna pan Major ngah a, Tungzang suante lakah Rank sang pen hipah

– 1996 Tungzang khua ah Dawi biakna (Lawki) bei-in, Khristian khua kici ta

– 1996 Tungzang bawlung tualpi kitobeh

– 1997 Baptist pawlpi Golden Jubilee kibawl

– 1999 Cituilui Tuitha khuaphelep (Hydropower) kila

– 1999 Pa Hau Lian Mung’ makaihna tawh “Teute Tangko – Monthly Newsletter” kihawmkhia

– 2000 Tungzang khuasat zawh kum 100 cin pawipi (Centennial Jubilee) kibawlin, Kumza phawkna Mualsuang kiphut

– 2000 November 25 ni-in CNF /A te’n Pa Zam Tung Thang (hausapa) kaplum

– 2001 Sia Khampeek makaihna tawh Kawlpi pansan in Zomibup Thukizakna “Zo Aw – Weekly Newsletter” leh Kumpi theihpih “Tongsan Journal Monthly” tuni dong kihawmkhia

– 2003 JAG pawlpi Silver Jubilee kibawl

– 2006 Pa Thang Kap Mang’ makaihna tawh «Mangta Shield» a vengveng kidem

– 2007 World Vision huhna tawh Bizang pan Tuimuk khat kilakbeh

– 2008 Tan 8 sang khen (Middle School Branch) kingah

– 2009 EBC pawlpi pianzawh kum 30 cinna Pearl Jubilee kibawl

– 2009 Tungzang Global Association (TGA) kiphuankhia

– 2009 Tungzang Youth Association (TYA) kiphuankhia

– 2010 Rev. Cin Lian Sum in Christian International School of Thelogy (CIST), Thailand pan Doctor of Divinity (DD Honorary) ngahin, biakna lamah Doctor ngah masapen hipah

– 2012 Zosuntang Group makaihna tawh Khua nawlah Welcome & Good bye Signboard kibawl

– 2012 TGA makaihna tawh Tungzang Zato inn (Rural Health Center-RHC) building kilam

– 2013 Middle School pucca kingahin building zong Pawnmual ah kilam pah

– 2014 Zomi Census “914 Zomi“vai Tungzang khuazang le khuakim khuapaam khua 7 kipaikhawm

– 2014 Pa Kam Khan Mungte innkuan hanciamna tawh Thungetna Inn kilam

– 2015 Khuazangbup kithukim diamna tawh ZCD party Mee (Vote) kipia

– 2018 Kum 100 cin phawkna Innpi le Teute Hotel lamna ding Innmun kumpi pan Register kingahkhia

– 2018 TGA makaihna tawh Tungzang Kum 100 cin phawkna Innpi le Teute Hotel lamna ding Tuiphum han lui munah innmun kizik

– 2019 January kha sungin TGA panpihna tawh TYA le khuazang mapang khawmin Teute Cycle lampi kizik /kisial

– 2019 August kha in TYA Tin Jubilee Tualpi laizang ah kibawl

– 2019 November kha sungin Kawlgambup Zomi Siamsin Khawmpi le Seminar kibawl

– 2019 June 20, ni-in TGA in USA kumpi theihpihna (Register) kingahkhia

– 2019 June – July sungin Pu Thomas Khanno (Tuithang mi) ii hong piak Khadawmi singno kung 1500 kisuan

– 2019 July kha sungin Asia Development Bank (ADB)te’ huhna tawh Cituilui tuitha mei (Hydro power) kipuahkik

– 2019 July 16 ni-in Full Gospel Assembly Tungzang kiphuankhia

– 2019 August kha sungin Zolengthe Group te’ hanciamna tawh “Zolengthe Tower” khat khua laizang ah kilam

– 2019 August – September kha sungin Tuithang – Tungzang kikal Suangphah theihna ding pi (fts. 22’) zai-in, Union kumpi huhna tawh nasiatak lampi kikek behin Suang kiphah

– 2019 December 12 ni-in TGA Tin Jubilee pawipi TGA Innpi lamna ding munah thupitak kibawl

—————————–

Khuasat akipan Khuasakzia le Khantohna Huampi Etna: 

1899 – 1970 Lokhawh, singpuak, gankhawi, ton le zunnun, galmat sa-aih, Piantit (France) paina le galkap (Paltan) tum hun.

1970 – 1990 Khualzin gamvak sum le paii zongin Suangkhuk mun Bawdwin, Mogoh, Khamti, Hpakant, Lamka, Tonsim, Aizawl, Kawlpi cihte ah kizinkhia in, tawm khatte’n University le Laisiangtho sang kah hun.

1990 – 2000 Malaysia, Singapore, Korea, Thailand le India etc…(gamnihna) ah pawl khat sum zongin pusuah hun.

2000 – 2010 UNHCR phualpi omna mun Malaysia le India gamte kizuankhiat hun.

2010 – 2015 Gam thumna kici USA, Canada, Australia, Denmark, Norway, Sweden le New Zealand gamte tun henhan hun.

2015 – 2020 Kawlgam kikhelna zui in, Tungzang khua zong nasiatak khangto ta. Gam nihna (or) Lamkal Malaysia, India gamte ah haksatna lianpi tawh honpi khat om laitak.

2020 – Gam thumna tungsa Khangthakte le gam sung a om pilna sin khangthakte’n leitung Level pilna, siamna le hauhna tawh khua le tui zun le puah ta ding….

 

 

TUNGZANG GLOBAL ASSOCIATION (TGA) PIAN KHIATZIA TOM KIM

Kawlgam galkap kumpi’ ukcipna hangin Kawlmi /Zomite’ nuntak khuasak zia haksa luatna hangin, I teenna khua le tui ciat pan khuamu zawdeuhte sum le paii zong in India, Thailand, Malaysia, Singapore, Japan le Korea gamte ah kizinkhia hi. A diakdiak in abeisa 2000 kim akipan gam thumna kici USA, Australia le Europe gamte tunnop manin Malaysia le India gamte ah UNHRC bel dingin a lomlom in kipaikhia khia phengphang leuleu hi. Tua sungah Tungzangte zong kihel bek tham loin, Pasian huhna tawh abeisa 2010 kim akipan gam thumna kici; USA, Australia, Canada, Norway, Denmark, Sweden, New Zealand gamte ah kitung khengkhang hi.

Tungzang mite’ sung pan Sia Mang Khan Khup pen abeisa 1993 kumin Singapore tungmasa bek tham loin, kum 8 sung om hi. 1994 akipan Pa Kai Mung (Singapore), Pa Khen Muan (Singapore) Pa Thang Sum Mang (Korea), Pa Pau Sian Mung (Singapore)te zong Singapore; Korea cihte ah zinkhia uh hi.  Tua zomah 1998 kumin Sia Thang Do Hang in USA Visa tawh USA tungin, Tungzang mi sungah US a tung masa pen hipah hi. Amaute’ khit 2000 kim akipan sum nei zawdeuhte Malaysia ah a honhon in kipaikhia hi. 2001 kumin Sia Mang Khan Khupte Innkuan Canada gam tung hi. 2010 kim akipan Malaysia pan USA, Australia gamte ah a lomlom in kitung zihziah in, tuni dong kizomzom lai hi.

Hih bang a gam thumna akitun ngeingai ciangin, omna mun le gam ciat pan khua le tui, gam le lei itna le veiina khang bek tham loin, zuunnopna le puahnopna lungsim kinei ciat hi. Abeisa 2000 hun ciangciang tuhun bang danin Online Social Media cihte omlo ahih manin, khat le khat thukizakna le kizopna ding haksa mahmah lai hi. Tungzang khua le tui zuunkhopna ding lunggulhnate lian semsem ahih manin, abeisa 2009 kumin Leitungbup Tungzang Kipawlna (Tungzang Global Association-TGA) cih kipawlna kiphuankhia hi. A sawt lo mahin TGA makaipi (Executive Committee) kiteelna leh Department tuamtuam panmun sehnate akipan TGA thukhunpi le Thumeiletpi (Constitution and Bylaw) cihte dongah kiciantak kibawlkhia hi.  Kipawlna kician khat ahih manin, Ngim le tup (Aims and Objective), Sep le bawl ding (Mission) leh Sunmang (Vision) cihte kiciantak kinei hi.

TGA Ngim le Tup bulpite (Aims and Objectives)

(1) Leitung mun tuamtuam a om Tungzang suan khempeuhte khat le khat kimeltheihna,ki-itna, kipumkhatna le kihuhtuahnate akhan semsem nading.

(2)  Pianna Tungzang khua leh Tungzang suante khempeuh in pilna, cidamna, anneek tuidawn, neih le lamte ah kicingzaw le khantohna ding.

(3) Leitung thu le Pasian thu ah Thumanna, cihtakna le itna bulphuh in leitung khuahun luanzia tawh kizui gamtat, luhet, kampau kilawm tawh khantohna ding.

(4)  Belh le muan ding neilo, ahuh a kem ding omlo pumpi le lungsim zawngkhalte puakpih in, genkholh theihloh cimawh-dongtuakte panpih nading.

(5)  Mipil, siamna, mihau, mithahat, min le za neite vangpia le pahtawi siamin khua le tui ading zattheih nading.

(6) Hih ngimna leh tupna bulpite tawh kituaklo bek thamlo kipawlna iinasepnate a susia, a thanem sak, lawm le gual vai akideidanna, beh le phung kideidanna, gam ki-ukna (politics) vai akideidanna le biakna (religious) hang a kideidanna cihte akipan kipawlna asiasak ,kikhenkham thei thu le la khempeuh nasiatak nial le langpan ding.

Mission: Leitung khuahun luanzia tawh kizui pilna, siamna, gamtat, luhek, kampau kilawm tawh khua le tui, le minam sungah a bukim khantohna’ng nasem ding.

Vision:  Kipumkhatna tawh Gualzawh sawm ding (Where there is Unity, there is always victory)

TGA – Central Executive Committee (2009-2011)

  1. Mang Khan Khup     – President
  2. Khen Za Muan Thang – Vice President 1
  3. Thang Do Hang – General Sectary
  4. Kap Kho Vel Sang – Treasurer
  5. Treasurer
  6. Auditor 1
  7. Auditor 2
  8. Finance Secretary
  9. EC Members:

TGA – Central Executive Committee (2012- 2015)

  1. President
  2. Vice President 1
  3. Vice President 2
  4. General Secretary
  5. Secretary 1
  6. Secretary 2
  7. Treasurer
  8. Treasurer
  9. Auditor 1
  10. Auditor 2
  11. EC Members:

TGA – Central Executive Committee (2016 – 2018)

  1. Khan Lian Khup – President
  2. Thang Sian Kham – Vice President
  3. Thang Thawn Mang – General Secretary
  4. Hau Lian Mung – Asst. Secretary
  5. Kai Lian Pau – Treasurer
  6. Pau Sum Thang – Auditor

EC Members:

Hang Thawn Tuang

Thang Go Thawng

Cin Go Pau

Gin Za Hau

Kap Za Khai

TGA – Central Executive Committee (2019-2021)

  1. Kam Lian Mung  – President
  2. Hang Thawn Tuang  – Vice President 1
  3. Thang Go Thawng   – Vice President 2
  4. Thang Sian Kham – General Secretary
  5. Lian Zo Tuang – Asst. Seceratry 1
  6. Kam Sian Piang – Asst. Secretary 2
  7. Thang Sum Mang – Treasurer
  8. Kam Suan Mang – Asst. Treasurer
  9. Langh Khan Khup – Auditor
  10. Kam Kap Thang – Asst. Auditor
  11. Nang Cin Thang – Finance Secretary
  12. Thawng Sum Mung – Asst. Finance Secretary

Members:

  1. Thang Pian Mung
  2. Cin Kap Suan Thang
  3. Kham Lian Hau
  4. Thawng Khen Thang
  5. Michael Thang Muan Sum

Information and Public Relations

  1. Khup Sian Sang
  2. Kam Go Cin

 

©2019–Tungzang Global Association. All Rights Reserved..